امسح الدمعة لا تسافر بالحيل أحبك

امسح الدمعة ترى ضعفك قوي= انهزم قدام ضعفك يا غلاي
امسح الدمعة بعمري لو تبي= عطني احزانك وخذ مني هناي
امسح الدمعة قبل تقضي عليّ= دمعتك تغرق صباحي في مساي
لا تروع مثل روعات الظبي= روعتك ياروعة أيامي بلاي
كل ليلٍ مع نهارك ينجلي= يا بدايات الهوى يا منتهاي
يا وطن قلبي وغربة ناظري= يا إحتياري يا صوابي يا خطاي
يا بنات الفكر غني وارقصي= عند خلي وانشدي له من غناي
وسعي صدر الحبيب واطربي= طربتي له كلما ذعذع هواي


لا تسافر وتتركني اجاهد غلاك= كل شيءٍ يهون إلا جهاد الغرام
اما تبقى معاي أو أسافر معاك= لا تخليني لطوال الليالي طعام
خوفي البعد لامنه خذاك وطواك= مثل قصرٍ تولاه الزمن والهدام
هاجس النفس هو بلوى أبوك وبلاك= من يحب الضمان اللي وراه التزام
لا تسافر وانا اللي في رجا الله ثم رجاك= لا تسافر وتلقاني بقايا حطام

ياما حلا وجهك بضي القناديل= مرسول صدقٍ من عيونك دعاني
وياما حلا همسك وطيفٍ سرى بليل= حدث سكوني وابتهج به زماني
بالحيل أحبك ياهوى البال بالحيل= وبالحيل تسرقني لقربك ثواني
قنديل من ضيّه هوانا مراسيل= نور لي الآمال مع عمر ثاني
حديثك السامر وليل التعاليل= مع داعي الاحساس شوقٍ خذاني
أبحر أغاني في عيون المواويل= وتلقى الأماني في عوينك مواني